सामाजिक जागृतीकडे एकत्रित पाऊल — राष्ट्रीय जनहित परिषद व गाथा परिवार यांची प्रबोधन बैठक यशस्वीरित्या पार पडली

वाघोली, पुणे | दि. १९ जुलै २०२५
(जिल्हा प्रतिनिधी – रिपब्लिक व्हॉईस ऑफ इंडिया, अलीशा तांबोळी)

वाघोली येथील कोलते फर्म हाऊस येथे विविध सामाजिक समस्यांवर चर्चा करण्यासाठी महत्त्वपूर्ण प्रबोधन बैठक आयोजित करण्यात आली होती.
ही बैठक महाराष्ट्राचे माजी पोलीस महासंचालक सुरेश खोपडे यांच्या मार्गदर्शनाखाली आणि डॉ. चंद्रकांत कोलते यांच्या उपस्थितीत पार पडली.

या बैठकीत अनेक महत्वाच्या मुद्द्यांवर चर्चा झाली:

* महाराष्ट्र सरकारने जनसुरक्षा विधेयक विधानमंडळात मंजूर केल्याबाबत,
* जिल्हा परिषद शाळा बंद करून बहुजन समाजाचे शैक्षणिक नुकसान होण्याची शक्यता,
* तसेच सोलापूर जिल्ह्यातील अक्कलकोट येथे संभाजी ब्रिगेडचे प्रदेशाध्यक्ष प्रवीण दादा गायकवाड यांच्यावर झालेल्या भ्याड हल्ल्याचा निषेध व्यक्त करण्यात आला.

डॉ. चंद्रकांत कोलते म्हणाले की, अन्यायाच्या विरोधात बहुजन समाजाच्या सर्व पक्ष आणि संघटनांनी एकत्र येऊन सरकारच्या दडपशाहीला उत्तर दिले पाहिजे.

या वेळी गाथा परिवारचे शिवले नाना, श्रीमंत झुरुंगे, रवी तात्या कंद, सुदाम पाटील यांनीही आपली मनोगते व्यक्त केली.
अमोल लोंढे यांनी देशातील मनुवादी विचारसरणी संविधान आणि लोकशाही विरोधात असल्याचे सांगितले.

सुरेश खोपडे साहेब यांनी आपल्या प्रेरणादायी वक्तव्यात सांगितले:
“कोणतेही कार्य करताना नकारात्मक विचार बाजूला ठेवले पाहिजेत. परिवर्तनवादी विचारसरणीचे लोक एकत्र आले, तर आपण आपल्या देशहितासाठी आणि येणाऱ्या ‘कबीर’ (भविष्यातील पिढ्या) साठी मैदानात उतरून लढा दिला पाहिजे. मी एकटा पडलो तरीही बहुजन समाजाच्या हक्कांसाठी आणि देशाच्या भल्यासाठी लढायला मागे हटणार नाही.”

राष्ट्रीय किसान मोर्चाचे प्रदेशाध्यक्ष सीताराम बाजारे यांनी सामाजिक मुद्द्यांवर जनआंदोलनात सहभागी होण्याचे आवाहन केले आणि सांगितले की बामसेफ ही बहुजन समाजाच्या राष्ट्रीय प्रश्नांवर संघर्ष करणारी एकमेव संघटना आहे.
प्रा. डी. बी. धावारे यांनी बामसेफच्या भुसावळ येथे होणाऱ्या राज्य अधिवेशनाच्या प्रचार पत्रकाचे वाटप केले.

कार्यक्रमाचे सूत्रसंचालन हरीभाऊ गायकवाड यांनी केले, तर आभार प्रदर्शन मोहन वारघडे यांनी केले.

ही बैठक बहुजन समाजाच्या हक्क, सामाजिक न्याय आणि एकत्रित लढ्याची सुरुवात ठरली आहे.